Redcross

Cruz Vermelha de Timor Leste (CVTL) ho Doador Koica no The Promise hala’o inagurasaun bee mo’os iha Suco Asumanu no Suco Leotela iha Postu Administrativu Bazartete Municipiu Liquiça. 

Ba projeto be ne’ebé inagura ona ne’e servisu hamutuk ho komunidade sira no mós apoiu husi doador sira mak Koica no The Promise ho orsamento ba projeto ne’e hamutuk kuaze U$ 50 mil ital. Osan ne’e mai husi Koica no defende ami nia proposta mak The Promise organizasaun ne’ebé mai husi Koica nian. Dehan Prezidente CVTL Nacional José Pereira da Conceição remata inagurasaun be mo’os iha suco Leotela, 

Nia informa tan, distansia be ne’e ba suco rua ho distansia hanesan hotu mak 4 kilometro ital no 800 metros. Kontribuisaun husi kada komunidade  U$ 3.00 ho total familia hamutuk 47 no mós total osan hamutuk U$ 172.00 ne’e kontribuisaun husi komunidade nian ba projetu be ne’e. 

Ba oin aldeia sira ne’ebé mak seidauk hetan be mós diretor Koika no doador The Promise hateten ona katak kontinua atu halo projeto ne’e kontinuasaun, maibe depende mós ba orsamento. Agora planu ami hanoin atu halo ba lantriñas ou sintina tanba projetu sei kontinuasaun para segura saude.

Iha fatin hanesan country derector Koika Heong-Chul khang hateten, ami servisu hamutuk CVTL no The Promise ba iha saude, saneamento no saude. Ami servisu kleur ona iha Timor liu-liu iha suco Asumanu ne’ebé ami hare’e komunidade difisil atu hetan be, ho apoiu ida ne’e ami fornese be ba komunidade sira ne’ebé iha area remotas.

Tan ne’e mak husu ba komunidade sira tenke kontrola be no mós halo manutensaun ba kanu ne’ebé a’at, lalika estraga kanu ne’ebé iha, tamba apoiu husi CVTL ho nia teknikamente be ne’e to’o ona iha komunidade nia le’et. 

Nune’e mós country derector The Promise Seyoung hateten, ho ita nia susesu no rezultado sistema be no saneamento agora diak ona. No ami espera katak komunidade tenke kontrola be ba sustentabilidade saude no aktividade seluk hanesan agrikultura. Orsamento husi The Promise apoiu hamutuk U$ 150.000 ba tinan ida nian.

Chefe suco Asumanu Bernardino Martins hateten, ami suco rua sente orgulho basá halerik hela ba Bee maibe ami hetan tulun ajuda husi CVTL no parseiru sira, bele kanaliza be ba ami nia suco. Tan ne’e mak ami husu ho projetu ida ne’e bele kontinua nafatin para bele ajuda komunidade sira ne’ebé iha area rural.

Nia informa, rezultado benefisiario hetan be suco Asumanu hamutuk aldeia 4, total familia 483, total populasaun 2.541, mane 1.272 feto 1.269 maibe husi aldeia 4 ne’e aldeia Kaikasiko mak asesu ona be mo’os. Ita hare’e fali ba benefisiario naunfiziku iha aldeia Kaikasiko total familia hamutuk 42, total populasaun hamutuk 502 mane 223 no feto 279.

Ba benefisiario suco Leotela hamutuk aldeia 5, total familia hamutuk 627, total populasaun hamutuk 3.019 mane 1.664 feto 1.335. Husi aldeia 5 ne’e aldeia Caimegoluli mak hetan be mo’os. Ita hare’e fali ba benefisiario naunfiziku iha aldeia Caimegoluli total familia hamutuk 65, total populasaun hamutuk 335 mane 183 feto 152.

Alende mós escola sira ne’ebé hetan be mak EBF 12 Tolema total alunos hamutuk 249 mak mane 129 no feto 120 ho  apoiu orsamento U$ 50.00. Ami iha suco rua hamutuk aldeia 7 mak seidauk hetan be mo’os no aldeia rua mak asesu ona be. Tan ne’e ami husu ba ministeriu relevante no parseiro sira para kontinua nafatin projeto ida ne’e hodi ajuda komunidade nia moris iha area remotas. Dehan Xefi Suco Bernadino.

Loron Kuarta (29/03/2017).